مقادير شاورما الدجاج, تحضير الشاورما بالبيت
250 غ صدر دجاج مقطع أطراف رقيقة
1 بصلة صغيرة محكوكة
3 ضروس ثومة محكوكين
ملح و إبزار
½ زلافة صغيرة ديال الخل و معلقة صغيرة من القرفة ” هدا هو السر في المداق ”
2 معالق كبيرة ديال الزيت ما غاديش نديروها في الاول
رقدي الدجاج مع المكونات ما عدا الزيت , غطيه و خليه على الاقل 3 او 4 ساعات و من الأفضل ليلة كاملة.
ملي تبغي طيبيه ضيفي شوية ديال الخرقوم الى بغيتي و غطيه و نقصي عليه العافية.
خليه حتى إنشف من الخل والماء لي طلق عاد ضيفي 2 معالق كبار ديال الزيت و خليه اتقلى فيهم مع التحريك.
ملي تنشف الزيت طفي عليه
نجيو نحضرو خبز الشوارما:
زلافة كبيرة ديال الدقيق
1 معلقة صغيرة ديال الخميرة الجافة
1 معلقة صغيرة سنيدة
1 معلقة كبيرة من الزيت
الملح
ماء دافئ
نعجنو العجينة ديالنا مزيان و نقسمها على 6 كرات.
{ القياس لي قدمت ليكم كيعطي 6 شوارمات}
خليهم ارتاحو واحد 5 دقائق و بداي سرحي بالدلاك الكرةالاولى بعدما تكوني سخنتي المقلة ديالك.
سرحي مزيييان و ديريها طيب.
ملي يبانو ليك بحال فقاعات قلبي علي الجهة الُثانية كيفما باين فالصورة
لي طابت دخليها للبلاستيكة باش إبقاو رطبين.
باش نعمرو الشوارمات ديالنا غانحتاجو :
خس مقطع
شوية ديال الفريت
فروماج السندويتش
صوص المايونيز { 2 معالق كبار مايونيز + 1 معلقة صغيرةزيت الزيتون + 1 ضرس ثومة محكوك + عصير نصف حامضة }
ونبدو نعمرو الشوارمات ديالنا كيف ما باين في الصور.
فوق الدجاج نضيفو معلقة صغيرة من صوص المايونيز الي حضرنا و نوضعو 1/2 مربع الفروماج , و نسدو الشوارما ديالنا على هاد الشكل
ليست هناك تعليقات:
إرسال تعليق