صابلي برستيج

صابلي برستيج :

المقادير :
نصف مارغرين لذة
بيضة وحدة
صفار بيضة
كاس سكر صقيل
نصف كاس زيت
1 فاني
الدقيق حسب الخليط
قبسة ديال الملح
وللتزيين :
شكلاط بيض
شكلاط اسود
جليكوز والناباج
شوية ديال الكوك
كونفيتير اختيارية
شوية ديال اللوز مقرمش اختيييياري
طريقة التحضير :
في قصعة نخدمو السكر والزبدة مزيان حتى تولي خليط كريمي ونضيفو البيضة وصفار البيضة الثانية والملح والزيت والفاني وقبسة الملح وفي النهاية نبقاو نضيفو الدقيق حتى يتجمع الخليط ولكن يبقى لين ماشي قاصح بزاف ..
نديروه في ميكة بيضا في الثلاجة لمدة نصف ساعة
في انتظار العجينة تكمل نصف ساعة فالثلاجة غادين نذوبو الشكلاط البيض بوحدو مع معلقة ديال الزبدة في حمام ماري , والشكلاط الاسود كذلك بنفس الطريقة وغادين ناخدو مولات الشكلاط انا ختاريت شكل التاج والويفي والخاتم حيث اندير صابلي مستطيلات ودوائر وهادشي كامل اتشوفوه في الصور تحت .
غادي ندير الشكلاط في المولات وندخلهم للثلاجة لمدة 3-5 دقائق ونخرجهم ونحيدهم من المولات ونحطهم على جنب حتى نوجد الصابلي
ملي نخرجو العجينة من الثلاجة نقسموها على زوج ولا على عدد الاشكال لباغين نديرو بالنسبة ليا درت زوج شكيلات اذا قسمت العجينة على زوج ومن وراها درتها بين زوج ميكات بيضين وفردتها بالدلاك .. حتى ولات رقيقة وبديت نقطعها بالطابع وليكم الاختيار في الطابع غير خصكم تراعيو الحجم ديال الشكلاط لغادين ديرو من الفوق ..
نحطو الشكيلات في اللاطة وندخلوها للفران ونشعلو عليها من التحت لمدة 20 دقيقة ولا قل شوية نحضيو معاها ومن وراها نشعلو عليها من الفوق حتى تحمر ونخرجوها
اناخدو العجينة الثانية بنفس الطريقة ولكن هاد المرة قطعتها بطابع دائري ...
في النهاية اناخدو 2 معالف جليكوز ومعلقة ناباج ونسخنوهم في حمام ماري وندهنو بيهم سطح الصابلي ونلصقو فوق منها الشكيلات لصاوبنا بالشوكولا كيفما تتشوفو في الصور
انا درت فوق بعض الشكيلات في الفراغ لكاين في الشوكولا كونفيتير واللوز وخلطتهم بالناباج والجليكوز باش يلصقو وفي الحواف ديال الصابلي درت الكوك .
تابعو الصور غادين يسهلو عليكم الخطوات
وفي النهاية جا المذاق رائع جدا وتنصحكم تجربوها خصوصا أن العجينة وحدة وتيمكن ليكم تخرجوا منها شكيلات كثييييرة ومتنوعة باش تزينو المائدة ديالكم